ҮҮСЭЛ, ХӨГЖИЛ

surguuliХөдөө орон нутагт мал аж ахуйн үйлдвэрлэлийн хэт дагнасан байдал, дэд бүтцийн хөгжлийн хоцрогдол, жижиг дунд үйлдвэрлэлийг хөгжүүлэх боломж муу байгаа зэрэг нь хөдөөгийн хүн амыг хот руу тэмүүлэх нөхцлийг бүрдүүлж бүс нутгийн хөгжлийг саатуулан төрийн ачааллыг улам хүндрүүлж байна. Нөгөө төлаас орон нутгаас нийслэл Улаанбаатар хотод ирж их дээд сургууль төгсөгчдийн 90-ээд хувь нь орон нутагтаа очиж ажиллахгүй төвлөрсөн суурин газрууд бараадах болжээ. Иймд хөдөө орон нутагт их дээд сургуулийг нээн ажиллуулах нь дээрхи тулгамдсан асуудлыг шийдвэрлэхэд нэг чухал алхам болох юм гэж үзэн 1997 онд Архангай аймгийн төв Цэцэрлэг хотод доктор С.Гансүхийн санаачлагын дагуу  Монгол улсын гэгээрлийн сайдын 1997 оны 6 сарын 12 –ны өдрийн 169 тоот тушаалаар  Гэлэг коллежи  нэртэйгээр  анх үүсгэн байгуулагдсан.

  Анхны хичээлийн жилийг 1997 он 9 сарын 1 нд нягтлан бодох бүртгэл, малын эмнэл зүй гэсэн хоёр салбартайгаар 5 багш, 3 анги, 98 оюутантайгаар эхлүүлсэн юм. Сургууль байгуулагдах анхны жилүүдэд гүйцэтгэх захирлаар математикийн ухааны магистр Б.Болормаа, эдийн засгийн салбарын эрхлэгчээр эдийн засгийн ухааны магистр Д.Гүррагчаа, малын эмнэл зүйн салбарын эрхлэгчээр мал эмнэлгийн ухааны доктор Ц.Лундаа нар ажиллаж байв.

 2000 оноос  тус сургуулийн бүтцэд өөрчлөлт орж дэргэдээ гүнзгийрүүлсэн сургалттай ахлах сургууль нээж цогцолбор болсонтой холбогдуулан холбогдох дээд байгууллага зөвшөөрсний дагуу тус сургуулийн нэрийг Гурвантамир коллежи гэж нэрлэх болсон.

Өнгөрсөн хугацаанд үүсгэн байгуулагчийн хөрөнгөөр нэг ээлжинд  600 оюутан хичээллэх  хичээлийн байр, 50 гаруй оюутан амьдрах оюутны байр, спорт заал зэргийг  ашиглалтанд оруулав. Цаашид 120 хүүхдийн дотуур байрыг ашиглалтанд оруулах, байруудыг бохир, цэвэр усны нэгдсэн сүлжээнд холбохоор төлөвлөж байна.

Одоо тус сургуульд Архангай, Булган, Өвөрхангай, Завхан, Хөвсгөл, Завхан, Увс, Баянхонгор, Орхон-Уул зэрэг аймгуудаас 200-аад оюутан эдийн засаг бизнессийн удирдлага, нягтлан бодох бүртгэл, аялал жуулчлалын эдийн засаг удирдлага, Малын бага эмч, Жимс, жимсгэний аж ахуй, фермерийн аж ахуй эрхэлэгч, малын санитар, Санхүүгийн бүртгэл тооцооны ажилтан, Сүү, сүүн бүтээгдэхүүний тенохнологийн ажилтан, Зочид буудал, зоогийн газрын үйлчилгээний ажилтан гэсэн мэргэжлүүдээр суралцаж  20 гаруй багш,  ажиллагсадтайгаар үйл ажиллагаагаа хэвийн явуулж байна. 

JoomShaper